دارميات جميلة

دارميات

كلمن يكول انساك كله انته اعمى
واستلمه دك كلات واكسرله خشمه

بالدنيا ما موجود ولفي أبجماله
القمر من أيغيب يطلع بداله

ولفي الترف يا ريت عينج تشوفه
أيمر الكمر كل يوم يغسل أجفوفه

لو مر على الحلوات كل جرح يشفي
وكل وحدة حيل أتصيح يا ريته ولفي

ولفي التحبه الروح عالصبخة لو مر
أيطك الورد ويصير كل شبر أخضر

محبوبي لو شفتيه ما ضن تصبرين
وخطابه كل الناس أنتي التودين

هو الحسن شيفيد لوما الوفه وياه
لو حصل طيب الذات كلنا أنتمناه

الغربة وصلة بور ما بيها ثمرة
تترجه غيم الصيف يمطرله كطره

الغربة من الناس راوتني اشكال
و الجذب لو بفلوس ما ظنه ينكال

اسمر سمارك حلو و الكذلة متره
والقلب لو ينساك صدكني ابتره

ما ظن بعد هاليوم واحد يوافي
من نذكر الاخطاء الكل تجافي

مو بالقلب و انساك ساري وي دمي
كل علة بيه اتهون لو انته يمي

غربة ودمع همال فايض بأدينة
مشتاكة للطيبين روحي الحنينة

بأخر نفس مخنوك و اتمنى اشوفك
و اعذرني بس الموت يجبرني اعوفك


ويايه تظل للموت هذا انت حدك
البرزخ اعيشة وياك وبالجنة يمك

شك عيني وأشرب ماي وأترس جفوفك
خل وحدة بس أرجوك بيهة أرد أشوفك

مرتاح اكلك جذب صدكني مامرتاح
قلبي القفلته ورحت مارهم بيه مفتاح

عندك سبع شيبات عندك عجيبه
هم شفت هم سمعيت بلريه شيبه

بلريه عندك شيب عندك عجايب
بلقلب صار الشيب مثل الكصايب


صافن على الكلمات حاير شودي
وياك اظل للموت هذا آنة حدي

كون ابسما العشاق أصبح غمامه
أمطر عليك الشوق حد القيامه

ارد انشد الدكتور والشاعر وياه
شنهو الدوه الموصوف للفارك اهواه

شنهو الجمال البيك كيكة وعليها شموع
لك والله أخاف عليك من تضحك تموع

لاتندم على الراح شد عزمك ردورد
ولاتظن عالطيبين باب الله مسدود

صكر التعبته عليه وربيته بيدي
من طحت يشرب كام من دم وريدي

لاتحزن بدنياك كوم اضحكلها
تركص تكوم وياك من تركصلها

ليش العمر هيهات بس امتحانات
صح وخطأ تعليل واملاء فراغات

وية الدمع حسيت ظل ينزف الفص
هم شايف انت عيون من تنحب تغص؟

شلتك دمع بالعين يوم العرفتك
ومحد وصـف محبوب كدما وصفتك

ما جاملت انسان مره بحياتي
واتمنه كل الناس تحمل صفاتي

لو صرت ملك الموت لا ما اخافك
لو تبني اخر ساف ابني عله سافك