نداء من والدة شهيد

تعال لخاطر أُمك


وينك ما تجي منتظرك أهواي
مو أنته الـﮕلت يا خويه تانيني
أنتظرت بكل مسيه أو ناطر الباب
ونادي ابصوت ﭽنك ما تحاﭽـني
إذا زعلان ﮔلي خاطر أرضيك
فدوه إبهيـﭻ موقف لا تخليني
بعدني آنه وأنته تونه صحبان
الغيره البيك ما تقبل تآذيني
مو تدري أتفقنه آنه وياك
عله الصعبات وياي وتماشيني
إذا زعلان مرلي أبنومتي طيف
أفرشلك شليلي أو حاضر أو شتريد
خادم آنه إلك ونطيك مي عيني
وشعندك عتاب أوياي حاﭽـني
تذكر من ﮔـعت أوياك فد يوم
أودمع عينك مسحته أذكر أبـﭽـفيتي
ﮔـلت رايد وﮔـفتك أوﮔـف أوياي
إذا أنتَ أخوي أسندني وحميني
وسام الخاطر الله شبيك زعلان
هيـﭽـي الموت باﮔك غفل عن عيني
أدري العطلك يا سبع ما جيت
خذاك الأقوه منك من شرايني
يا هيبة أخوتك يا عقل ميزان
يا شمعة اوردتها اليوم تضويني
عمت وسفه المنايا أتغالطت وياك
أو باﮔت هل شباب امن البساتيني
تعال الخاطر أمك شيل الدموع
رايد هاي جبره منك أنطيني
تعال أوشوف أحمد ساكن الباب
ينادي أوياك خويه أولا تخليني
إﭽـت ربعك عليك افلان وفلان
وﮔـفت بالمكان البيه تلاﮔـني
شوف أحمد ذبل ﮔـاضيته الدموع
يصيح وسام بعدك من يشاقيني
فرقد أمجد أو كرار خلدون
تبـﭽـي الليل كله أو حيل تآذيني
خالك يخي يبـﭽـي أو ظهره مكسور
يذكر حــﭽـيك أوياه أويواسيني
يل جرحك ﭽـبير أو عيب ينراف
بس أدموع عيني إلي تسليني
تمنيت العمر يندار للغير
ﭽـا ﮔتلك أخذ كل عمري وسنيني
ﭽـا طشيت عمري لـﭽـدمك أنذور
ولا أبخل عليك أبكل مياديني
وسام أوياك أخذني فدوَ للعباس
ما أحمل أفراﮔك زين تدريني

بارك الله فيك اخي مشاركة رائعه